️| هل أنا معني بأداء الضريبة على مدخولي في Airbnb؟ 

الجواب: نعم

كيف كاتعرفوا أن منصة Airbnb هي واحد الفضاء رقمي عالمي كايمكّنك من أنك تعرض الشقة ديالك للكراء اليومي، بغرض يتواصلوا معك المغاربة أو الأجانب السيّاح اللّي باغين يكريو من عندك إقامة قصيرة المدة؛

وهاد الخدمة إن صحّ التعبير، كاتقاضى عليها واحد الدخل يومي بموجب العرض لي قدّمتيه في المنصة المذكورة؛

🤔سؤال: واش أنا فعلاً خاصني نخلّص الضريبة بالرغم من أنّ هاد النوع من الخدمات ما زال غير مقنّن في المغرب؟

الجواب: نعم 🤷‍♂️

وذلك للاعتبارات القانونية التالية:

1️⃣ أن القانون الضريبي في المغرب يتدخل عندما يتحقق الدخل؛

2️⃣ أن الدخل لي كايتّسم بطابع التكرار هو خاضع للضريبة، بغض النظر عن عدم تحديد النوع ديالو صراحةً في القانون (المادة 30 من المدونة العامة للضرائب)؛

3️⃣ كاين كذلك الصنف الرابع من الضريبة على الدخل، والمتعلق بالضريبة على الدخول العقارية (عائدات الكراء)؛

4️⃣ إدارة الضرائب عطاها المُشرّع الحق تكتاشف هاذ الدخل ديالك في حال ماصرّحتيش به وما أديتيش مبلغ الضريبة، في إطار مساطر المراقبة الضريبية المعنية.

وخا وشنو هي الضرائب اللي أنا ملزم باش نأديها سنويًّا؟

الجواب: ثلاثة 🙆‍♂️

1️⃣ الضريبة على الدخل؛

2️⃣ رسم السكن؛

3️⃣ رسم الخدمات الجماعية(الضريبة على النظافة).

🔢 مثال تطبيقي للفهم:

نفترض أنك شخص ذاتي ماخدامش نهائيا وغير متزوج وماعندكش أبناء، وعندك شقة كاريها عبر منصة Airbnb بسومة كرائية يومية تقدر ب 400 درهم لليلة الواحدة، وكاتكريها 25 يوم في الشهر وعلى طول السنة؛

1️⃣ حساب الضريبة على الدخل اللّي غاتخلّص:

📑الدخل السنوي: 400 درهم * 25 يوم * 12 شهرًا= 12 مليون السنتيم 

المصاريف اللي عندك كالتالي:

- لوازم تجهيز الشقة الضرورية: 4000 درهم؛

- بعض الإصلاحات الضرورية: 2000 درهم؛

- لوازم التنظيف السنوية: 800 درهم؛

- السانديك: 700 درهم؛

- استهلاك الماء: 3600 درهم؛

- رسم الخدمات الجماعية: 3780 درهم.

الدخل الإجمالي بعد خصم المصاريف هو: 120.000 - 15.880 = 104.120 درهم (10 المليون السنتيم و4120 درهم).

📊 هاد المبلغ اللّي وصلنا ليه، المُشرّع جزاهُ الله خيرًا عطاك واحد الخصم ديال 40% منه، أي بالتالي:

الدخل الصافي المطبّق عليه الضريبة هو: 104.120 - (104.120*40%) = 62.472 درهم

هاد الدخل الصافي كانمشيو نشوفو شنو السعر المطبق عليه في جدول الأسعار ديال الضريبة على الدخل؛

كانلقاوه بأنه مطبق عليه سعر 20%؛

وبالتالي: 62.472 درهم * 20% = 12.494,4 درهم (مليون و50 ألف ريال تقريبا)

واش هذا هو مبلغ الضريبة اللي خاصني نخلص؟ لا 🙆‍♂️

كاين خصم آخر كانقصوه من بعد ماكانطبّقو السعر ديال 20%، اللي هو 10.000 درهم (مليون السنتيم).

12.494,4 درهم - 10.000 درهم = 2494,4 درهم

📌إذن الضريبة على الدخل اللي غاتخلص هي: 49 ألف ريال وشي صريّف.

2️⃣ رسم السكن:

نفترض بأنك غير معني بإعفاء 5 سنوات الأولى وأن لجنة الإحصاء اللّي نص عليها القانون باش تحدد القيمة الكرائية لهاد الشقة حدّدتها في: 3000 درهم للشهر الواحد؛

فإن مبلغ رسم السكن كايتحدد كالتالي:

3000 درهم * 12 شهرا * 20% = 7200 درهم.

3️⃣ رسم الخدمات الجماعية:

كايتحدد المبلغ ديالو بناءً على المعادلة التالية: 

= القيمة الكرائية السنوية كما حددتها لجنة الإحصاء * 10.5%

إذن مبلغ الرسم هو: 

3000 درهم * 12 شهرًا * 10.5% = 3780 درهم

إذن الضرائب اللي غاتخلّصها سنويا في إطار نشاطك في منصة Airbnb هي كالتالي:

1️⃣ الضريبة على الدخل: 2494,4 درهم؛

2️⃣ رسم السكن: 7200 درهم؛

3️⃣ رسم الخدمات الجماعية: 3780 درهم.

المجموع هو: 13.474,4 درهم

مقارنةً مع شحال كاتدخّل سنويا ما نسبته 11% من الضرائب.